嫌貨才是買貨人

古早人講：「嫌貨才是買貨人。」真正有影，今仔日閣欲來嫌 Starbucks。

無愛佮人𤲍（kheh）捷運，我慣勢早出門。公司猶未開門，在來（chāi-lâi）攏佇 Starbucks 食早頓、歇睏，看冊，兼聽一寡人客的 niú-suh。

毋管是囝仔相舂（cheng）、半路認老爸的社會新聞，抑是雞母相踏、翁某相拍這款房間內的代誌，攏聽會著。袂輸仝時捘（chūn）幾若（kuí-nā）台 la-jí-o͘h，抑是聽幾若个 podcast。

niú-suh 另工才（chiah）來講，翻轉來講 su-thah-pa-ko-suh（Starbucks）。

從（chn̂g）致著(tì–tio̍h)胃潰瘍的症頭，頻若啉牛乳，絕對腹內風彈死恁祖公（放屁啦），na-thé(拿鐵）攏換燕麥奶，減冰角、斟滇 (thîn tinn)，安呢加20，

今仔日欲用 App 點咖啡，伊講愛更新。揤（chhi̍h）落去，煞袂自動更新，閣愛去「久古」（Google）家己揣，起毛（khí-mo͘）就咧䆀（bái）矣。

閣講，減冰、斟滇猶愛另外加十五箍。算算咧，換燕麥奶加二十，斟滇閣加十五，攏總加三十五箍。

譀（hàm）死怹祖公！袂規氣去搶較緊？

嫌罔嫌，明仔載敢閣會去買？

註釋

niú-suh：外來語，源自日語「ニュース」（nyūsu），日語又借自英語 news。這篇借用來指人客口中的新聞、消息與八卦，帶有戲謔意味。

la-jí-o͘h：外來語，源自日語「ラジオ」（rajio），日語又借自英語 radio，指收音機。

斟滇：白話字 thîn tīⁿ；台羅 thîn tīnn，意思是斟滿。教育部辭典收錄「斟」與「滇」兩詞。

文中加價金額與 App 操作情況，記錄作者這次點餐的個人經驗。

從（chn̂g）：參《臺日大辭典》，第621頁，中欄，第3詞。文獻位置依作者提供。

用字參考：教育部《臺灣台語常用詞辭典》「𤲍」、「捘」、「幾若」、「斟」、「滇」、「譀」、「相舂」、「相拍」、「致著」。